ملک کو موجودہ بحران سے نکالنے کے لیے پاکستان کو ایک نئی سیاسی جماعت کی ضرورت ہے۔ ایک ایسی جماعت جو اصلاحات متعارف کرانے کا وژن اور صلاحیت رکھتی ہو اور جو جمود کی قوتوں کو چیلنج بھی کر سکتی ہو۔ ایک ایسی جماعت جو نہ نظریاتی بوجھ سے لدی ہوئی ہو اور نہ ہی اسٹیبلشمنٹ کے ہاتھ میں بندھی ہوئی ہو۔ ایسی جماعت جو اپنی طاقت صرف عوام کی حمایت سے حاصل کرنے میں کامیاب ہو۔
ایسی سیاسی جماعت کے بارے میں سوچنا دن میں خواب دیکھنے کے مترادف ہے۔ بہر حال یہ ایک فطری ذہنی مشق ہے کیونکہ ذہن انتہائی بحران کی صورت حال میں فرار کی راہیں تلاش کرتے ہیں۔ دماغ یہ وہم پیدا کرنا شروع کر دیتا ہے کہ منظر نامہ جلد ہی بدل جائے گا۔ یہ وہم مصیبت زدہ روحوں کو عارضی سکون فراہم کرتا ہے۔
لیکن ایک نئی سیاسی جماعت کی خواہش کرنے میں کیا حرج ہے؟ ملک میں ایک بڑا اتفاق ہے کہ تمام بڑی سیاسی جماعتیں ناکام ہوچکی ہیں۔ ان کی سیاست اسٹیبلشمنٹ کی سرپرستی حاصل کرنے کے گرد گھومتی ہے اور اس عمل میں وہ سیاسی اور اخلاقی طور پر دیوالیہ ہو چکے ہیں۔ یہ بات ایک نئی مہم جس کا عنوان ’’ری امیجننگ پاکستان‘‘ ہے کے رہنماؤں نے بھی کہی ہے۔ یہ مہم حال ہی میں مسلم لیگ ن اور پی پی پی کے سیاسی منحرف افراد کے ایک گروپ نے شروع کی تھی۔ یہ گروپ خود ایک نئی تصوارتی پارٹی کے قیام کی صلاحیت رکھتا ہے تاہم اس گروپ کے ارکان نے ان خبروں کی تردید کی ہے کہ ان کا ایسا کوئی ارادہ ہے۔ اس کے بجائے ان کی توجہ مستقبل کے لائحہ عمل پر اتفاق رائے پیدا کرنے پر مرکوز دکھائی دیتی ہے جو پاکستان کو موجودہ دلدل سے نکالنے کے لیے تمام اسٹیک ہولڈرز کو اسٹریٹجک رہنمائی فراہم کر سکے۔ ان سیاستدانوں نے مہم کا آغاز کوئٹہ سے کیا اور انسانی حقوق کی خلاف ورزیوں، معاشی اور سیاسی بحرانوں اور سب سے اہم بات یہ ہے کہ ان تمام چیلنجز سے نمٹنے میں سیاسی جماعتوں کی نااہلی سے متعلق مسائل کو بہت بلند آواز کے ساتھ اجاگر کیا۔
اس میں کوئی شک نہیں کہ پاکستان کو معاشی اور سیاسی بحرانوں سے نکلنے کے لیے بنیادی اصلاحات کی ضرورت ہے۔ تاہم سب سے بڑا چیلنج موجودہ طاقت کا ڈھانچہ ہے جو مکمل طور پر اپنے اندر نظر ثانی نہیں کرنا چاہتا۔ یہ ‘چھوٹے نتیجے’ کی تبدیلیوں کے لیے خود کو ایڈجسٹ کرتا رہتا ہے اور اس طرح جمود کو برقرار رکھنے کے قابل ہوتا ہے۔ نظام کو چلانے والے اور اسٹیبلشمنٹ، سیاسی قیادت، بیوروکریسی اور صنعتی اور زرعی گروہوں کے درمیان گٹھ جوڑ پر مشتمل اقتدار کے اشرافیہ، اندرونی اصلاحات کا راستہ اختیار کرنے کے بجائے عادتاً مدد کے لیے باہر کی طرف دیکھتے ہیں۔ مقامی اور بین الاقوامی مطبوعات نے اکثر اس حقیقت کو اجاگر کیا ہے کہ اس اشرافیہ نے ملک کو ایک ایسے موڑ پر پہنچا دیا ہے جہاں لوگوں نے امید کھونی شروع کر دی ہے۔ سسٹم پر اعتماد میں کمی بالآخر جلد یا بدیر سسٹم کے خاتمے کا باعث بنے گی۔
ساختیاتی تبدیلیوں کو متعارف کروانے کے لیے یہ صحیح لمحہ ہے کیونکہ سوچ کا عمل ابھی بھی فعال ہے۔ ٖغورو فکر کرنے والے مختلف حلقوں میں لوگ اپنے خیالات لے کر جارہے ہیں جن میں ‘ری ایمیجننگ پاکستان’ کے رہنما بھی شامل ہیں۔ زیادہ تر اچھے خیالات سازگار ماحول کی عدم موجودگی میں مر جاتے ہیں۔ ایک بار جب یہ معاہدہ ہو جاتا ہے کہ موجودہ سیاسی ڈھانچہ ڈیلیور کرنے کے قابل نہیں ہے تمام سیاسی جماعتوں کو موجودہ طاقت کے ڈھانچے میں اصلاح کی کوشش کرنے سے پہلے خود کی اصلاح کرنا ہو گی۔ فی الحال وہ بغیر کسی وژن یا اصلاح کی صلاحیت کے، چاہے وہ اقتدار میں ہوں یا نہ ہوں، ایک ہی سمت میں جا رہے ہیں۔ یہ بحران بھی ایک نئی سیاسی جماعت کے لیے جگہ پیدا کرتا ہے جسے اپنی طاقت عوام سے حاصل کرنی چاہیے اور بعد میں ٹھوس طریقوں سے خدمت کرنی چاہیے۔
اتفاق سے 160 سیاسی جماعتیں پہلے ہی الیکشن کمیشن آف پاکستان میں رجسٹرڈ ہیں اور ان کے منشور میں ملک کو درپیش تمام مسائل کا احاطہ کیا گیا ہے۔ نظریاتی اور مذہبی تقسیم کے علاوہ بہت سی جماعتیں انسانی اور اقلیتی حقوق کے تحفظ کا دعویٰ کرتی ہیں۔ رجسٹرڈ سیاسی جماعتوں میں سے تیس کے نام ‘عوام’، ‘عوامی’ یا ‘عام لوگ’ ہیں، جن میں پاکستان پیپلز پارٹی کے درجن بھر دھڑے شامل نہیں ہیں۔ 21 مسلم لیگوں اور 30 سے زائد مذہبی جماعتوں کے علاوہ دو بہت ہی ممتاز جماعتیں بھی الیکشن کمیشن میں رجسٹرڈ ہیں اور وہ ہیں پاکستان تحریک اجتہاد اور تحریک درویش پاکستان۔
جیسا کہ ظاہر ہوتا ہے یہ جماعتیں کچھ خوابوں کے بعد وجود میں آئیں۔ اگرچہ ان کے قیام کے پیچھے کوئی حقیقی محرکات ابھی تک معلوم نہیں ہیں، لیکن اگر وہ زمینی طور پر فعال نہیں ہیں تو اس کا مطلب یہ ہے کہ وہ کچھ آئیڈیلسٹ افراد نے قائم کی ہیں جن کے پاس عوام کو اپنے ایجنڈوں کے گرد متحرک کرنے کے لیے وسائل یا توانائی نہیں ہے۔ ورنہ وہ ملک کے پیچیدہ سیاسی منظر نامے میں کچھ جگہ چاہتے تھے۔ اسٹیبلشمنٹ کو بھی اپنی رفتار برقرار رکھنے کے لیے پراکسیز کی ہمیشہ ضرورت رہتی ہے۔
پاکستان کی اس تصواراتی سیاسی جماعت کو بائیں یا دائیں بازو کی طرف جھکاؤ نہیں ہونا چاہیے اور اسے ہر شعبے میں ڈھانچہ جاتی اصلاحات پر توجہ دینی چاہیے۔ اس کا مطلب یہ نہیں کہ خوابوں کی پارٹی ٹیکنوکریٹس پر مشتمل ہوگی۔ تاہم اصلاحاتی ایجنڈا مختلف پالیسی سازی کے عمل کے ذریعے آنا چاہیے جن پر بالآخر بحث ہوتی ہے اور پارلیمنٹ سے منظوری لی جاتی ہے۔ یعنی پارٹی کو پارلیمنٹ کی بالادستی پر پختہ یقین رکھنا چاہیے۔ ایسی سیاسی جماعت میں ہمت ہو گی کہ وہ تمام طاقتور اداروں کو قانون کے سامنے جوابدہ کرے۔ اگرچہ خوابوں کی پارٹی میں وہ تمام مثبت خصوصیات ہونی چاہئیں جو عام آدمی سوچ سکتا ہے لیکن اس میں ایک خوبی نہیں ہونی چاہیے – عملیت پسندی۔ جس دن پارٹی عملی ہو جائے گی وہ خوابوں کی پارٹی نہیں رہے گی۔
سوال یہ ہے کہ ایسی پہل کون کر سکتا ہے؟
ایک ممکنہ جواب یہ ہے کہ تمام بڑی سیاسی جماعتوں کے درمیان اختلاف رائے ہے۔ جو لوگ نکالے گئے ہیں یا نکالے جانے کے راستے پر ہیں یا اپنی قیادت سے ناخوش ہیں وہ پارٹی کے معاملات بھی چلا سکتے ہیں اور ملک کے بھی۔ ہر مرکزی دھارے کی پارٹی میں چند ایسے اختلافی لوگ ہوتے ہیں اور اگر وہ ایک پلیٹ فارم پر آئیں اور علاقائی سیاسی جماعتوں کو جذب کر لیں جن کے پاس قومی جمہوری تحریک کی طرح چند حلقے جیتنے کی انتخابی طاقت ہے تو وہ ایسی پارٹی کی طرف بڑھ سکتی ہیں جس کا خواب بہت سے لوگوں کی طرف سےدیکھا جاتا ہے۔
یہ تنقید بھی کی جا رہی ہے کہ یہ سیاسی رہنما زیادہ تر مخالف نظام کا حصہ رہے ہیں اور بغاوت کی ہمت کھو چکے ہیں، یا یہ کہ وہ جلد ہی عملی ہو جائیں گے۔ بہت کم لوگ ہیں جو اسٹیبلشمنٹ کے دباؤ کا مقابلہ کر سکتے ہیں۔ ویسے بھی ایک خواب اب بھی ایک خواب ہے لیکن یہ افراتفری کے وقت پریشان روحوں کو راحت فراہم کرتا ہے۔
